السلام عليكم ورحمة الله وبركاتة
من غير اى مقدمات ومن غير اى حاجة انا هخش فى الموضوع على طول
انا اسمى احمد وشهرتى سكر عندى 23 سنة من القاهرة
شاب فقير وعلى اد حاله اخد الاعدادية بالعافية ودخل تدريب مهنى ومنجحش
الحمد لله رب العالمين على كل شئ يجيبه ربنا
سيبت التعليم ومكملتش وفكرت انى اشتغل واشيل نفسى
اشتغلت ربنا كرمنى وتعبت كتير بس مكنش ليا حظ
حظى قليل جدا فى كل حاجة شغل فلوس لبس كل حاجة كل حاجة
سافرت واشتغلت ومهما اشتغلت مبعرفش اعمل لنفسى حاجة لان مفيش اهتمام من الاهل
لقيت ان متعتى الوحيدة هى الكمبيوتر اتعلمت الكمبيوتر واتعلمت النت
ولو مكنتش اتعلمته مكنش زمانى معاكم هنا
عمرى فى حياتى ما مشيت مع بنت زى الشباب
من خلال النت اتعرفت على بنات كتيرة وعملت صداقة جميلة جدا
كان صحاب فوق الوصف بس الكل بتاع مصلحة محدش فيهم يعتمد عليه بعد الله عز وجل
بشتغل وبسيب مصروف للبيت مع والدى والحمد لله بس كنت مع نفسى مبحبش الاوامر والتحكمات
اخويا الكبير شوية وابويا شوية وامى شوية لحد ما تعبت
قررت انى اعيش لوحدى وفعلا عيشت لوحدى
شوفت كتير من الزل والاهانة وزهقت بجد
علشان الخص معاكو انا اتعرفت على بنت جميلة جدا
عايشة مع ابوها وملهاش اخوات وامها متوفية
حسيت انها محتاجة حد يكون جمبها
وحسيت انى انا كمان محتاج للامان من اول وجديد ومحتاج انى فى دنيا جميلة
اعيش كويس بقى والاقى واحدة تحبنى وتخاف عليا
كان احساس جميل جدا انى اعيش قصة حب جميلة مع البنت دى
يوم مع التانى ابتديت انجذب ليها وابتديت احلم بيها وانا نايم
لدرجة انى كنت بشوفها ادام عنيا وانا شغال وانا نايم وانا قاعد فى كل مكان
معرفش عملتلى ايه
طلبت منها نمرة موبايلها ادتهالى وقولتلها هتصل بيكى الصبح
وفضلت يومين متصلش بيها
وفى اليوم التالت كلمتها فبتقولى مين معايا
قولتلها انا سكر
قالتلى حبيبى
متتخيلوش كلمة حبيبى دى حسيت بأيه لما سمعتها
حسيت انى فى السما مش عايز انزل منها
عيشنا مع بعض اجمل ايام مشوفتهاش فى حياتى ولا كنت بحلم بيها وانا نايم
جت عندى وعرفتها على والدتى وعلى اخواتى والعيلة
حبوها جدا وهى كمان حبتهم
وكنت لما اجى اكلمها تسألنى اول حاجة عن اهلى وتسلم عليهم اوى
اتفقنا على الجواز وكل حاجة ورتبت معاها كل حاجة وفعلا تم كتب الكتاب
والمفروض انى اجهز نفسى علشان الدخلة
اليوم اللى كل بنت بتحلم بيه
وكانت كل حاجة ماشية كويس مفيش اى حاجة
حبيبتى دى ليها ابن خالتها مش بتطيقو
وكان لما يتصل بيها كانت بتضايق اوى لانها مش بتحبه
بس هتعمل ايه ابن خالتها
سالتها فى مرة حازم ده عايز ايه قالتلى عادى بيطمن عليا
قولتلها اوك وانا مقدرش انى امنعها من اهلها
وخصوصا ان دى خالتها الوحيدة
بعد كام يوم ابوها تعب وهو فى الامارات واخدها معاه
علشان يصفى شغله وينزل القاهرة بقى ويستقر
اتصلت بيا وعرفتنى قولتلها سلامته الف سلامة وطمنينى دايما بالتليفون
بقيت كل يوم اتصل بيها تكنسل فى وشى
تقفل الموبايل وكل فين وفين لما ترد عليا
وبقت تقولى معلش يا احمد انا مقصرة فى حقك استحملنى
وطبعا اللى بيحب مش بيهمه حاجة زى كده وبيصبر
قولتلها بطلى الكلام بتاعك ده ان مكنتش استحملك مين اللى هيستحملك يعنى
وقفلت معاها وكل حاجة كويسة
من كام يوم كل ما اتصل بيها تكنسل او غير متاح او مغلق
لحد ما قلقت عليها
لحد ما جه اخويا الصغير بيقولى عايزك فى موضوع بس من غير نرفزة
وانا اساسا القاولون عندى عصبى جدا وبتعصب من اقل حاجة
قالى ابوها هيجوزها ابن خالتها وهى مستنيه منك تليفون
اتصلت بيها ردت عليا خلتها تفتح النت وتكلمنى
وبكل بساطة تقولى ايه
كل شء نصيب ومكتوب
واحنا من اول اتنين حبو بعض
ومش اول اتنين يسيبو بعض
طيب انا ذنبى ايه
عملت ايه انا مش وحش
انا رحت فين
واهلى اللى عارفين انك مراتى هيقولو ايه
والعقد بتاع الجواز ده لزمته ايه وانتى عارفة انك متجوزة ومكتوب كتابك
انا قصرت فى ايه علشان يحصل ده كله
وابوها عمل ليه كده
ده سؤال ونفسى الاقى اجابه ليه
وطبعا علشان مقفش فى طريقها رحت طلقتها وخلصت كل حاجة
ليه الواحد بيحصله كده
مع انه بيكون مخلص وكويس ومش وحش والله العظيم
والله انا مش وحش
صعب فى الزمن ده ان الواحد يلاقى الحب بجد
ولو لقاه بيطلع فى الاخر خيانة
ولو مكنش خيانة بيبقى تجريح فى القلب اللى الواحد مش يملك غيره
الحمد لله
وانا اسف انى طولت عليكم
موضوع: دى قصتى انا ياريت تفهموها كويس 
الأحد أبريل 06, 2008 4:01 pm
